المحتويات
مقدمة
هذي السياسة توضح شنو البيانات اللي يجمعها تطبيق «كامبيوني» (Campione) وموقعه، وليش، وكيف نحميها. كامبيوني ديوانية ألعاب: بلنتيات سين جيم، وبلوت، ورماية أطباق، وسباق خيل، والمدرّج.
البيانات اللي نجمعها
| البيان | ليش نحتاجه | مربوط بحسابك |
|---|---|---|
| الإيميل | تسجيل الدخول، ورمز تأكيد التسجيل، واسترجاع كلمة السر | نعم |
| كلمة السر | تسجيل الدخول — محفوظة مشفّرة بطريقة ما تنسترجع | نعم |
| اسم المستخدم، والاسم الظاهر، والدولة | تظهر للاعبين بالمباريات والتصنيف | نعم |
| الصورة الرمزية (إذا اخترتها) | تظهر للاعبين | نعم |
| الفئات المفضّلة | أسئلة على ذوقك | نعم |
| حساب Apple أو Google (إذا سجّلت فيه) | تسجيل الدخول: معرّف الحساب والإيميل بس | نعم |
| اللعب: المباريات، والإجابات، والنتايج، والألقاب، والإسطبل | التصنيف، والبطولات، وسجل مبارياتك | نعم |
| المدرّج: التفاعلات، والعبارات، والتصويت، والتوقعات | تظهر لربعك بالمدرّج | نعم |
| رسائل «راسلنا» (مع صورة الشاشة إذا أرفقتها) | عشان نرد عليك | نعم |
| البلاغات والحظر | حماية اللاعبين | نعم |
| رموز الجلسة وحدود المحاولات | الأمان — بصمة مشفّرة (hash) | نعم |
| تقارير الأعطال (Sentry) | تصليح الأعطال — بدون معرّف للمستخدم ولا اسم ولا إيميل ولا IP | لا |
شي ما نجمعه أبداً
- ما نحفظ عنوان IP ولا موقعك الجغرافي. لحماية رموز الغرف من التخمين بس، نستخدم بصمة مشفّرة مؤقتة من عنوان الاتصال، وهالبصمة ما تكشف العنوان.
- ما فيه إعلانات ولا تتبّع بين التطبيقات أو المواقع، وما نستخدم أي معرّف إعلاني.
- ما نقرأ جهات الاتصال ولا الصور ولا الملفات. الصورة اللي ترفعها إنت (صورتك الرمزية أو صورة الشاشة) هي بس اللي توصلنا.
- إشعارات التطبيق محلية على جهازك، وما نحفظ رمز إشعارات.
ليش نستخدمها
- تشغيل حسابك والألعاب والبطولات والغرف الأونلاين والمدرّج.
- الإيميل: نرسل عليه بس رمز تأكيد التسجيل ورمز استرجاع كلمة السر لما تطلبه، عن طريق Amazon SES. ما نرسل إيميلات تسويقية.
- منع الغش وحماية التطبيق، وتصليح الأعطال.
شنو يشوف اللاعبين الثانيين
اسمك الظاهر وصورتك الرمزية ودولتك ونتايجك وألقابك تطلع للاعبين الثانيين داخل اللعبة: بالترتيب، والغرف، والمباريات، والمدرّج.
البلاغ والحظر
تقدر تبلّغ عن أي لاعب أو تحظره من ملفه أو من مقعده بالغرفة. البلاغ يوصل لنا مع سببه، ونراجعه. الحظر يمنع التواصل بينكم من الطرفين (الدعوات، ودخول نفس الغرفة، والتفاعلات)، وتقدر تلغيه من «حسابي» ← الإعدادات ← «المحظورين».
التخزين والأمان
البيانات محفوظة على خوادم Amazon Web Services في فرانكفورت (الاتحاد الأوروبي)، ومشفّرة أثناء النقل والتخزين، والوصول لها محدود.
حذف الحساب ومدة الاحتفاظ
نحتفظ ببياناتك طول ما حسابك موجود. تقدر تحذف حسابك بأي وقت من التطبيق (طريقة الحذف): بياناتك الشخصية تنمسح من الخدمة فوراً، والنسخ الاحتياطية تنمسح خلال ٣٠ يوم. المباريات اللي لعبتها تظل بنتايج اللاعبين الثانيين باسم «حساب محذوف» بدون أي بيانات عنك.
حقوقك
تقدر تطلب نسخة من بياناتك، أو تصحيحها، أو حذفها، من داخل التطبيق أو بالتواصل معنا على mubarak@we8ers.com.
الأطفال
التطبيق لمن عمرهم ١٣ سنة وفوق، وما نجمع بيانات أطفال دون ١٣ سنة عن قصد.
التعديلات
إذا عدّلنا هالسياسة نحدّث التاريخ فوق، ونبلغك داخل التطبيق إذا كان التعديل جوهري.
تواصل معنا
أي سؤال عن بياناتك: mubarak@we8ers.com